Նկարագրություն

Հեղինակը՝ Եղիշե Չարենցի անվան գրականության և արվեստի թանգարանի տնօրեն, գրող Կարո Վարդանյանն այդ առիթով գրել է. «Տակավին երեկ տպարանից դուրս եկած այս գիրքը կազմելու և լույս ընծայելու գաղափարը ծնվեց այն չարաբաստիկ գիշերը, երբ սոսկումով իմացանք, որ ավելի քան 40 օր մոլորության մեջ ենք եղել, որ ոչ միայն «չենք հաղթում» ու...

Հեղինակը՝ Եղիշե Չարենցի անվան գրականության և արվեստի թանգարանի տնօրեն, գրող Կարո Վարդանյանն այդ առիթով գրել է. «Տակավին երեկ տպարանից դուրս եկած այս գիրքը կազմելու և լույս ընծայելու գաղափարը ծնվեց այն չարաբաստիկ գիշերը, երբ սոսկումով իմացանք, որ ավելի քան 40 օր մոլորության մեջ ենք եղել, որ ոչ միայն «չենք հաղթում» ու «չենք հաղթելու»՝ այլև կոտրվել է մեր զինուժի ողնաշարը և անառիկ Արցախը հանձնվել: Իսկ առավել հեռատեսներն անմիջապես զգացին Սյունիքի գլխին կախված տագնապները: Այս գիրքը մեր օրերի համար հարեհաս բալասան է՝ հասցեագրված հատկապես հայ զինվորին: Դավադրությունների արդյունքում հոգեբանորեն ջլատված ու հիասթափված զինվորը այս ժողովածուի էջերում իսկույն կճանաչի իրեն, կշտկի մեջքը, կգիտակցի, որ իր նմանը չկա աշխարհում, որ իր տոկունությունն ու անպարտելիությունը միշտ էլ ներբողվել է օտար ականատեսների կողմից: Վերջապես, կգիտակցի, որ ինքը անտեր չէ, որ հավերժ իր հետ է Անդրանիկը Զորավար, որի փառքը կազակները հասցրեցին մինչև Բայկալ ու Սիբիր, իսկ բրիտանացի հազարապետը ի լուր աշխարհի հայտարարեց. «Մեծ պատերազմը ավելի դրամատիկ ու հերոսական կերպար, քան այս հայ գեներալն է, չի տվել»: Հատորում ներկայացված վավերագրերը ժամանակի հերոսականության և ողբերգականության հարազատ արտացոլանքն են: Եվ, ամենակարևորը, դրանցում երևութանում է ամենահզոր և հռչակավոր Հայի ռազմական հանճարը, ժողովրդի հանդեպ հայրական հոգածությունը և ասպետական վեհանձնությունը: Կարո Վարդանյան